Biləsuvar rayonunda Milli Mətbuatın yaranmasının 150 illiyi münasibətilə rayonda fəaliyyət göstərən media nümayəndələri ilə görüş təşkil olunub.
Cənub Press-in bölgə müxbiri xəbər verir ki, tədbirdə çıxış edən Biləsuvar Rayon İcra Hakimiyyətinin başçısı Faiq Qürbətov jurnalistləri peşə bayramı münasibətilə təbrik edib. O, bildirib ki, 150 il əvvəl Həsən bəy Zərdabinin böyük çətinliklər fonunda nəşrinə başladığı “Əkinçi” qəzeti Azərbaycan mətbuatının bünövrəsini qoymaqla xalqın maariflənməsində mühüm rol oynayıb. Bu qəzet ana dilində jurnalistikanın inkişafına təkan verib, ölkədə böyük bir mətbuat məktəbinin əsasını yaradıb. Rayon rəhbəri çıxışı zamanı media nümayəndələrinin Biləsuvarın ictimai-siyasi, sosial-iqtisadi və kənd təsərrüfatı sahələrində görülən işləri mütəmadi işıqlandırdıqlarını qeyd edərək, onlara təşəkkürünü bildirib. Tədbirdə çıxış edən Biləsuvar Rayon Polis şöbəsinin rəisi Nəsib Məmmədov və Yeni Azərbaycan Partiyası Biləsuvar Rayon Təşkilatının sədri Kamil Qurbanlı da jurnalistləri peşə bayramları münasibətilə təbrik edib, fəaliyyətlərində uğurlar arzulayıblar. Media nümayəndələri göstərilən diqqət və qayğıya görə rayon rəhbərliyinə təşəkkürlərini bildiriblər.
Sonda jurnalistlərə Milli Mətbuatın 150 illiyi münasibətilə Fəxri Fərmanlar təqdim olunub, xatirə şəkli çəkilib.
