Azərbaycan Respublikası Elm və Təhsil Nazirliyinin Təhsildə inkişaf və innovasiyalar üzrə 8-ci qrant müsabiqəsinin qalibi Gülnar Nəcəfovanın rəhbəri olduğu Məktəblilərin təlim nəticələrinin artırılmasına “Sosial dəstək” layihəsinin icra planına uyğun olaraq 07.02.2025 tarixində yekun tədbirlər təşkil olunub. Lənkəran şəhər A.Məhərrəmov adına 7 nömrəli tam orta məktəbində təşkil olunan tədbirdə layihənin rəhbəri, məktəbin rəhbərliyi, layihənin eksperti, layihənin mühasibi, məktəbin psixoloqları, məktəbin müəllimləri, Dövlət Məşğulluq Agentliyinin Lənkəran-Astara Regional Məşğulluq filialının münayəndəsi, layihəyə seçilmiş şagirdlərin valideynləri, mətbuat nümayəndələri və digər qonaqlar iştirak edib.
Tədbiri giriş sözü ilə açan Məktəblilərin təlim nəticələrinin artırılmasına “Sosial dəstək” layihəsinin rəhbəri , məktəbin təlim-tərbiyə işləri üzrə direktor müavini Gülnar Nəcəfova tədbir iştirakçılarını salamlayaraq layihənin icra planına uyğun olaraq həyata keçirilən tədbirləri diqqətə çatdırıb. Yaradılan şəraitə görə Elm və Təhsil Nazirliyinə təşəkkürünü ifadə edib. Şagirdlərin layihəyə seçimləri, seçilmiş şagirdlərin valideynlərinin hər biri ilə fərdi görüşlərin təşkil olunması və bəzi valideynlərin evlərinə səfərlərin təşkil olunması kimi fəaliyyətlərin icrası zamanı əldə olunan nəticələri təqdim etmişdir. Belə ki seçilən şagirdlərin layihə çərçivəsində məktəbli forması, məktəbli çantası və ayaqqabı ilə təmin olunması ilə yanaşı onların valideynlərinin məşğulluq problemlərinin həll olunmasında da dəstəkləyici tədbirlərin həyata keçirildiyini vurğulayıb. Dövlət Məşğulluq Agentliyi ilə bu istiqamətdə əməkdaşlıq edildiyini diqqətə çatdırıb. Layihəyə seçilmiş şagirdlərin valideynləri üçün məşğulluq imkanlarına aid maarifləndici məlumatlar üçün sözü Dövlət Məşğulluq Agentliyinin Lənkəran-Astara Regional Məşğulluq filialının münayəndəsi Rəşid Rzazadəyə vermişdir.
Karyera məsləhətçisi vəzifəsində çalışan Rəşid Rzazadə təqdimat əsasında işə qəbul olunma prosedurları haqqında məlumat verib. Mütəmadi təşkil olunan əmək yarmarkaları və iş imkanları haqqında danışıb. Hazırda uğurla həyata keçirilən özünə məşğulluq proqramı barədə geniş danışıb.Bu və ya digər proqramlar sayəsində əldə olunan uğurlar haqqında məlumat verib. Bu proqrama qoşulma şərtləri barədə iştirakçıları məlumatlandıraraq onları belə proqramlardan istifadə üçün fəal olmağa dəvət edib. İştirakçıların suallarına ətraflı cavab verilib.
Maarifləndirici təlimdən sonra çıxış edən Lənkəran şəhər A.Məhərrəmov adına 7 nömrəli tam orta məktəbinin direktoru Aynur Məmmədova gələn qonaqları salamlayıb. Belə vacib layihənin maliyyələşdirdiyi üçün Elm və Təhsil nazirliyinə öz adından, məktəb kollektivi adından və valideynlər adından təşəkkürünü bildirib. Layihənin səmərəli həyata keçirilməsi üçün verdiyi dəstəyə görə Dövlət Məşğulluq Agentliyinin münayəndəsi Rəşid Rzazadəyə də təşəkkürünü ifadə edib. Aynur müəllimə layihə icra planına uyğun olaraq layihə komandasının gördüyü bütün işləri yüksək qiymətləndirərək böyük zəhmət tələb edən layihənin uğurla təşkil olunması münasibətilə layihə rəhbərliyini təbrik edib. Layihənin rifah halı çox aşağı olan məktəblilərin təlim nəticələrinin artmasına böyük töhvə verəcəyinə əminliyini ifadə edib.
Tədbirdə çıxış edən məktəbin təlim-tərbiyə işləri üzrə direktor müavini Ülkər Bəşirova və digər natiqlər də öz çıxışlarında layihə çərçivəsində görülən fəaliyyətləri yüksək qiymələndirərək layihə rəhbərinə və layihə komandasına təşəkkürlərini ifadə ediblər.
Çıxışlardan sonra Məktəblilərin təlim nəticələrinin artırılmasına “Sosial dəstək” layihəsinin rəhbəri Gülnar Nəcəfova tərəfindən layihəyə seçilmiş və ailəsinin sosial rifah halı aşağı olan 32 nəfər şagird üçün layihənin maliyyə dəstəyi ilə təmin olunmuş məktəbli formaları, məktəbli çantaları və ayaqqabılar onların valideynlərinə təqdim olunub. Bununla da layihə çərçivəsində nəzərdə tutulan əsas fəaliyyətlər uğurla yekunlaşıb.
Qeyd edək ki, Azərbaycan Respublikası Elm və Təhsil Nazirliyinin Təhsildə inkişaf və innovasiyalar üzrə 8-ci qrant müsabiqəsinin qalibi Gülnar Nəcəfovanın rəhbəri olduğu Məktəblilərin təlim nəticələrinin artırılmasına “Sosial dəstək” layihəsi 01.10.2024-01.03.2025-ci il tarixlərində Lənkəran şəhərində icra olunur. Layihənin məqsədi maddi rifah halı aşağı olan şagird ailələrinə sosial dəstək göstərməklə məktəblilərin dərslərə davamlı qoşulmasını təmin etməkdən və onların təlim nəticələrinin yüksəlməsinə dəstək olmaqdan ibarətdir.
Məktəblilərin təlim nəticələrinin artırılmasına “Sosial dəstək” layihəsinin mətbuat xidməti
