Son zamanlar bazarlarda və bəzi satış məntəqələrində süni üsullarla, palma yağından hazırlanmış saxta pendirlərin satışa çıxarıldığı barədə şikayətlər artır. Mütəxəssislər bildirirlər ki, bu cür məhsullar insan sağlamlığı üçün ciddi təhlükə yarada bilər. Çünki südlə hazırlanan təbii pendirin tərkibi orqanizm üçün zəruri olan kalsium, protein və vitaminlərlə zəngin olduğu halda, palma yağı ilə hazırlanan saxta pendirlər bədəndə həzm olunmur, damarların tutulmasına və digər xəstəliklərin yaranmasına səbəb ola bilir.
Bəs alıcılar necə ayırd edə bilərlər ki, aldıqları pendir təbiidir, yoxsa saxta?
Qida təhlükəsizliyi üzrə mütəxəssislər bir neçə sadə üsul tövsiyə edir:
1. Əgər pendiri kağız salfet üzərinə qoyduqda çoxlu yağ izi qalırsa, bu məhsulun tərkibində bitki yağı ola bilər.
2. Tavada qızdırıldıqda təbii pendir əriyib uzanır, amma saxta pendirlər əriyərkən yağ ayırır və kütlə şəklində qalır.
3. Dadına diqqət edin – təbii pendirin özünəməxsus süd iyi və kremli dadı olur. Saxta məhsullar isə çox zaman mumlu, süni dad verir.
4. Ən önəmlisi isə, məhsulun üzərindəki etiketə baxmaqdır. Əgər içindəkilər siyahısında “vegetable fat”, “palm oil” və ya “milk fat substitute” yazılıbsa, bu pendir süni yağlarla hazırlanmış məhsuldur.
Mütəxəssislər həmçinin alıcılara məsləhət görür ki, pendiri naməlum mənbədən, ucuz qiymətə almaqdan çəkinmək lazımdır. Çünki həqiqi südlə hazırlanan pendirin maya dəyəri yüksək olur və çox ucuz qiymətə satıla bilməz.
Əgər belə məhsulla rastlaşsanız, onu mütləq şəkildə foto və ya video ilə qeydə alın, qəbzi saxlayın və aidiyyəti qurumlara müraciət edin.
Unutmayaq: sağlamlığımızı qorumağın ən yaxşı yolu alış-verişdə diqqətli olmaqdan başlayır.
